Глобалниот медиумски форум на Дојче Веле ги поканува сите заинтересирани фото ентузијасти од целиот свет да учествуваат на меѓународниот фото конкурс “Клик“.  Се аплицира со фотографии кои прикажуваат ситуации поврзани со културата и образованието, или фотографии од проекти, акции и кампањи, кои се однесуваат на образованието и културната различност. Највпечатливите фотографии ќе се искористат за креирање на онлајн фото атлас, како и во публикациите на Глобалниот медиумски форум на Дојче Веле.

Истражувачкото новинарство е ударната сила на медиумите и на новинарите со која тие треба да ги штитат демократските процеси и јавниот интерес. Добрите истражувачки стории претставуваат врв во професионалните достигнувања на новинарите. Тие ја откриваат и користат вистината, со цел да го променат светот кон подобро и да поттикнат поодговорно однесување на институциите и на поединците кои се дел од нив. Како дел од постојаните заложби и напори за унапредување на професионалното новинарство и на демократските вредности во земјата, и оваа година, по единаесетти пат, Македонскиот институт за медиуми го објавува конкурсот за доделување на престижната новинарска награда: “НАЈДОБРА ИСТРАЖУВАЧКА СТОРИЈА НА ГОДИНАТА” Ги покануваме сите професионални новинари и редакции во Македонија да се пријават со една или повеќе истражувачки стории што ги објавиле во текот на 2011 година. Критериумите за оценување на квалитетот на сториите се достапни овде.

Новинари од Македонија, Албанија, Босна и Херцеговина, Бугарија, Црна Гора, Хрватска, Романија, Србија и Косово, најдоцна до 5 март 2012 година, можат да се пријават на конкурсот за Балкански стипендии за истакнато новинарство, што ги доделува „Балканската истражувачка мрежа” (BIRN) во соработка со фондацијата Роберт Бош (Robert Bosch) и ERSTE Фондацијата. Тема на шестото издание на оваа стипендирана програма се заедниците. Заинтересираните кандидати ќе треба да ги истражуваат различните заедници - политички, економски, национални, родови, генерациски, како и, односите меѓу нив, надворешните влијанија и развојот на сосема нови групи и фракции во општеството. Сториите треба опфатат појави кои се релевантни, важни и оригинални, и кои се од значење не само за матичната земја туку и за најмалку уште една земја од регионот и од Европската унија.

Новинари од Балканот кои покриваат политички и економски прашања, најдоцна до 4 март 2012г, може да конкурираат за учество во програмата „Известување за економски и политички теми од Југоисточна Европа“, која ја спроведуваат фондациите Роберт Бош и Томсон Ројтерс. Поттикнувањето на квалитетното аналитичко новинарство и на известувањето за економските прашања, покривањето теми кои се централни за регионалниот и политичкиот развој, како и охрабрување на регионалната соработка меѓу новинарите, претставува главна цел на оваа програма која е започната во 2007г.

Амбасадата на САД во Македонија го објави конкурсот за Годишната програма за професионален развој во областа на новинарството и масовните комуникации, која ќе се реализира во текот на учебната 2012 и 2013 година, во САД. Оваа програма, дизајнирана да придонесе во унапредувањето на професионализмот кај медиумите во Македонија, им овозможува на млади новинари и медиумски професионалци од земјава да ги подобрат своите вештини преку студирање и пракса на водечки универзитети во САД.

Нејаснотиите околу претстојниот процес на дигитализација, сиромашниот и презаситен медиумски пазар, недостатокот на финансии и на стручен кадар, се само дел од клучните проблеми со кои се соочуваат локалните медиуми во Македонија. Ова беше истакнато на вчерашната работна средба што се одржа во МИМ, а на која присуствуваа 15 сопственици и главни уредници од локални медиуми. Меѓу другото, на средбата уште еднаш беше нагласен проблемот со високиот надоместок од 4% од бруто годишниот приход што медиумите го плаќаат на Здружението за заштита на авторски музички права, како и  нетранспарентната распределба на овие средства од страна на ЗАМП.

МЕДИУМСКАТА ЗАЕДНИЦА Е ПОДГОТВЕНА ДА ГО ПРЕЗЕМЕ ВОДСТВОТО ВО РЕШАВАЊЕ НА СОСТОЈБИТЕ ВО МЕДИУМИТЕ Истакнати медиумски работници – новинари, уредници, сопственици и медиумски експерти, разговараа за проблемите во медиумската сфера во Македонија, на работната средба што се одржа од 27 до 29 октомври 2011 во Маврово, во организација на Македонскиот институт за медиуми и Здружението на новинарите на Македонија, а со поддршка од Амбасадата на Кралството Холандија во Македонија. Без оглед на меѓусебните разлики, по долго време новинарите заеднички ја реафирмираа својата подготвеност да се здружат  во решавање на состојбите во медиумите и да работат активно со сите релевантни институции и поединци за изнаоѓање на начини за надминување на состојбите.

Како регулативата за покривање на изборните активности се одразува на работата на медиумите беше главна тема на која дискутираа претставници на медиумите, Државната изборна комисија, Советот за радиодифузија, политичките партии и меѓународните организации на дебатата која се одржа во организација на МИМ и на Високата школа за новинарство и за односи со јавноста на 10 февруари 2009. Најголемиот дел од дискутантите како проблематични ги истакнаа нејаснотиите во Изборниот законик во делот кој се однесува на периодот од распишувањето на изборите до официјалниот почеток на кампањата, како и насоките донесени од СРД со кои се регулираат формите на медиумското претставување во период пред почеток на изборната кампања. Претставници од медиумите укажаа на опасноста од ограничување на слободата на медиумите, но и на наводна некоординираност меѓу државните институции задолжени за спроведување на изборната регулатива во однос на медиумите.   На дебатата беше заклучено дека главниот проблем за оваа ситуација лежи во нејаснотиите и недореченостите во Изборниот законик, поради што беше препорачано, по завршувањето на изборите, да се пристапи кон негова промена преку отворање јавна дебата меѓу сите релевантни фактори.   Воведничари на дебатата беа професор Весна Шопар, Бедредин Ибраими од ДИК, Фарук Омерагиќ од СРД, Роберт Поповски од ЗНМ и Младен Чадиковски од ТВ А1.                                    

Македонскиот институт за медиуми (МИМ) и Високата школа за новинарство и за односи со јавноста организираат дебата посветена на медиумите и регулативата за следење на изборните активности. Дебатата ќе се одржи на 10 февруари 2009 (вторник) во хотелот “Холидеј ин” во Скопје, од 10 до 12:30 часот. Цел на овој настан е да иницира дијалог помеѓу сите релевантни фактори во општеството во насока на соодветно разбирање и примена на изборната регулатива за работата на средствата за јавно информирање во периодот пред и за време на кампањата за претстојните избори.